أختي ريم
الحمد لله على سلامتك الوالد إن شاء الله رح يتعاون معك بس انتي كمان خليكي متفائلة
أختي ريم
أنا مقدر وضعك وحاسس فيكي وبعرف التعب والعذاب يلي انتي بس خلينا نفكر سوا
كل واحد فينا لو يرجع بالزمن لورا ويتذكر الأيام الحلوة أيام المدرسة مثلا ويقارنها بالوقت الحالي أكيد
رح يحس أن هالتفرة كأنها كانت مبارح وهي مر عليها سنوات طويلة
أختي يلي بدي قوله أن السنين عم تمر بسرعة عجيبة وخاصة لما قلت بركة الوقت من الدنيا
يعني عن جد صار الاسبوع عم يمر كأنه يوم ما في بركة بالمرة وغمضي عين وفتحي التانية بتلاقي الدنيا خلاص خلصت وجاء يوم المحشر والحساب
يعني بذمتك معقول منشان دنيا بهالمواصفات لا فيها بركة بالوقت وكل شي فيها فاني وزائل ببدلها بالجنة يلي هي دار الخلود والسرور
يعني منشان أن فلا ن من الناس مش قادر يمشي أو فلان قطعت أرجله وأيديه أو فلان فقد عزيز عليه
معقول منشان هيك أسباب أتخلى عن الجنة وأسوي شغلات تغضب ربي مني ويمكن بسببها ما أدخل الجنة
أنا بعرف أن يلي بيعيش المصيبة مش متل يلي بيتفرج من بعيد أنا مثلا عندي مصيبة زوجتي ومشاكل أخرى والحمد له على كل حال ألاحظ مهما الأشخاص الغريبين تعاطفوا معي ولكن لن يصلوا إلى نسبة 50 بالمائة من الإحساس بمصيبتي الحقيقية التي أعيشها ومع هذا لا يمكن القول إلا الحمد لله على كل حال والدعاء لله بالفرج العاجل نسأل الله الثبات
عزيزتي الصبر صعب أنا بعرف بس لما تفكري بكلامي بتشعري بلزة الصبر لأنك رح تصبري ساعة وبعدها رح يجيكي الفرج من أوسع الأبواب بالدنيا وبالآخرة بس اصبري واعطي الصبر حقه
أنا متأكد أنك صابرة وبتخافي الله كتير بس بدي منك تخليكي هيك وما تضعفي أبداً بالعكس لازم تنبسطي أكتر لأنك كل ماصبرتي كانت جائزتك أعظم وتخيلي من مين هالجائزة هالجائزة رح تكون من ربنا الكريم انتي متخيلة شو رح تكون هالجائزة
هلأ بدي ياكي تروحي وتسغفري الله سبحانه وتعالى وتقولي له انك غلطت وطالبة التوبة عن كلامك وطلبك انك تموتي وقولي لله سبحانه وتعالى أنك سلمتي أمرك له
بعدين في شغلة انتي نسيانتيها انتي بتصدقي الدكتور أكتر ولا كلام الله سبحانه وتعالى شو قولي
ربنا قال ان يلي بيدعيه رح يستجيب دعائه صح ولا لأ ... أكيد صح يعني شو ماصار فينا لما بندعي ربنا لازم نكون على يقين أنه رح يستجيب ويلي خلق مخك ممكن يخلق مخ تاني وتالت صح
يلا يلا رح اعتبر حالي ما قرأت مشاركات الأخيرة ومستني اسمع منك مشاركات حلوة وكل يلي هون صاحباتك واخواتك والشباب يلي هون هم إخوانك
وشو بدك بصاحباتك يلي تخلو عنك أصلا مابيستاهلو يكون أصدقائنا هيك ناس وعلى معظمن اكتشف أصدقائه المزيفين وصرنا نعرف مين بيحبنا ومبين ما بيحبنا وصرنا نعرف مين بيخاف الله ومين ما بيخافه وليعاذ بالله
يعني هالمرض كان كتير كويس لنعرف مين معنا ومين ضدنا وبنفس القوت لنعبي شوالات من الحسنات وناخذهم معنا ليوم الحساب ليكونوا سببا في رفع درجاتنا إن شاء الله نسأل الله أن يتقبلهم منا
هداك اليوم الواحد منا رح يكون بحاجة حسنة فكيف إذا معك شوالات من الحسنات
طبعا لن ندخل الجنة إلا برحمة ربنا نسأل الله أن يرحمنا ويرزقنا الفردوس الأعلى