منتديات حبة البركة - عرض مشاركة واحدة - البرنامج اليومي للـ ٣٠ يوم رمضان ان شاء الله

05-06-2018, 06:08 PM

البرنامج اليومي للـ ٣٠ يوم رمضان ان شاء الله

البرنامج اليومي للـ ٣٠ يوم رمضان ان شاء الله

بسم الله :

١- الـ ٥ صلاوات

خمس صلوات في المسجد للشباب.
الـ ٥ صلاوات في وقتهم بدون تأخير للبنات.

٢- السُنن الراتبه

( عندك ١٢ ركعه لازم تداوم عليهم يومياً .... ٢ قبل الفجر ... ٤ قبل الظهر و ٢ بعده .... ٢ بعد المغرب ... ٢ بعد العشاء )

٣- صلاة الضحي

( بتبدأ من بعد شروق الشمس بـ ثلث ساعه ... لحد قبيل أذان الظهر بـ ثلث ساعه ..... أقلّها ركعتين لحد ٨ ركعات ..إنت وهمّتك )

٤- أذكار الصباح والمساء

( أذكار الصباح بعد الفجر .... وأذكار المساء بعد العصر ..... لو نسيت تقولهم في ميعادهم قولهم مجرد ما تفتكر المهم متسبهمش )

٥- صلاة التراويح

- للشباب .... في المسجد طبعا مع الإمام واختار إمام يكون صوته حلو علشان تحسّ بالصلاه
- للبنات .... الافضل إنك تصليها في البيت ... بس لو عاوزه تنزلي إنزلي باللبس المنضبط وبكامل وقارك ...مش هتعرفي خلّيكي في بيتكوا أفضل

٦- الصدقه

( جنيه واحد يوميا ... وانت خارج من صلاة العصر إعطيه لأول سائل يقابلك ..... يبقي عندك ٣٠ جنيه في الشهر كله ....ولو انت مُيسّر الحال وربنا موسّعها عليك تصدّق بما يليقُ بك ...وافتكر في النهايه ان انت احوج للصدقه وأجرها من الففير )

٧- عمره او حج أسبوعيا

( إختار يوم في الاسبوع بعد ما تصلي الفجر متطلعش من المسجد ... خلّيك في المسجد لحد الشروق ورمضان ده ساعه واحده فاصله بين الفجر والشروق يعنى تقدر تعملها كل يوم باذن الله ... قول الاذكار واقرأ قرآن ... لك بذلك أجر حجه وعمره تامه تامه تامه .... اعمل الموضوع ده ٤ مرات في الشهر )

٨- قراءة القرآن

- لأصحاب الهمم العاليه مش أقل من ٥ ختمات في الشهر .... بواقع ٥ أجزاء يومياً ... يعني هتختم كل ٦ أيام مره
- لأصحاب الهمم المتوسطه مش أقل ٣ ختمات في الشهر ... بواقع ٣ أجزاء يوميا .... يعني هتختم كل ١٠ أيام مره
- للمبتدئين وأصحاب المشاغل ... مش أقل من ختمه في الشهر .... بواقع جزء كل يوم فقط

٩- الدعاء

( عندك ٣ أوقات انا مسمّيهم وقت تحقيق المعجزات )
- الربع ساعه قبل الفطار
- الساعه اللي قبل الفجر
- اخر ساعه بعد العصر من كل جمعه
( طبعا إنت محضّر الادعيه والحاجات اللي نفسك فيها وبتتمناها في ورقه ...... لحّ علي ربنا في ال ٣ أوقات دول .... هتشوف دعائك بيتحقق بعد رمضان كفلق الصبح ) شرط انك تدعي بإخلاص ويقين وصدق

١٠- ركعتين في جوف الليل

( عاااااارف ياسيدي والله إنك صليت التراويح .... بس ده ميمنعش انك تصلي ركعتين خفاف في وقت النزول الالهي ... علشان تبقي مُميّز مش زيك زي الناس ) .... وكمان ربنا بيقول ( وتزوّدوا فإن خير الزاد التقوي )
--------------------
دول ١٠ خطوات .... قسماً غير حانث ... إنك لو داومت علي الـ ١٠ دول ....خلال الـ ٣٠ يوم ..... هيكون أحسن رمضان عيشته في حياتك ....وهتخرج من رمضان إنسان نقي تقي ..... كأنك لسه مولود .... مين عارف مش جايز رمضان السنه دي هو نقطة انطلاقك اللي كنت مستنّيها من زمان ؟ جايز

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: خيمة رمضان