منتديات حبة البركة - كشمير بيسلم عليك

وأنا فى إبتدائى
شيخ قالنا إنك لو خايف من أى كلب فى الشارع
قوله بس بصوت عالى أخوك كشمير بيسلم عليك
وإن كشمير ده أو "قطمير زى ما قالنا"
كان كلب أصحاب الكهف وكل الكلاب عارفاه وبتحبه

المهم تانى يوم خدت بعضى وأنا متحمس جدٱ
أجرب الموضوع وأشوف رد فعل الكلب
وإزاى هلاقى ملامحه بتتغير للأحسن
وهو بيبكى وياخدنى بالأحضان وبيحن لأخوه كشمير

خدت بعضى ونقيت اكبر كلب جربان فى شارعنا
بحيث لو نبح عليا أقوله الكلمتين
يزعل من نفسه ويحس بتأنيب ضمير
إنى جايله من طرف أخوه كشمير وهو بيعمل معايا كدا ..

المهم دخلت عليه لقيته بيزوم عليا وأنا أقرب أكتر
وبإبتسامة طفل ملزق فى ٥ إبتدائى
قولتله " ششش أخوك كششششمير بيسلم عليك "
ومركز أوى على ريأكشناته عشان أشوف دموعه وهى بتخر

لقيت الكلب قام باصصلى وقالى
"خخخخخخخ هوعووووواعوو"
ولقيته جاى يجرى عليا والدنيا إسودت
قومت رامى الشبشب وفاتح الطيارة وهاتك يا جرى

وعمالة تجيلى أفكار وأنا بجرى
طيب هو مسمعش الإسم كويس ؟
طيب أرجع أقولهوله تانى بصوت عالى ولا أعمل إيه

وفضلت أجرى وأنا عمال أزعق بصوت عالى وأعيط
" ده أنا من طرف أخوك كششششمير يابن الو..... "
ودا فاتح ورايا ع الخامس
لحد ما المشهد خلص إنى إتكفيت على وشى ودماغى إتفتحت وخدت غرزتين لسه معلمين لحد النهارده
وختهم عبرة فى الحياة
إنك متسمعش لأى حد غير أبوك وأمك..

:2006-09-29-04_34_53
:sm74:

https://www13.0zz0.com/2023/01/07/11/991253246.jpg