منتديات حبة البركة - نصيحة لكل بنت لسى فبيت أبوها

لكل بنت لسا في بيت أبوها أرجوووووكي استمتعي على أد ما بتقدري ...

١- نامي كتيييير و لما تقومي ارتاحي شوي و بعدين كملي نوم .. اختمي ١٢ساعة نوم وإذا حدا فيقك رجعي عيدي من الأول .. بكرة لما تتجوزي و يصير عندك ولاد مارح تعرفي ترمشي مو بس تنامي رح تتحولي لزومبي عايش بالبيت ( أغنية الست دي أمي أصلها الست دي زومبي سهرانة طول عمرها )

٢-اي شي بيوجعك ركدي لعند الدكتور و اطمني على حالك ولا تهملي حالك استمتعي بنعمة انك قادرة تحددي للدكتور مكان الوجع .. بعد ما تتجوزي و يصير عندك ولاد مارح تقدري تحددي الوجع من وين جاية بالضبط لأن كل شقفة بجسمك بتكون عاملة مع التانية سيمفونية أوجاع

٣- أد ما فيكي حكي مع رفقاتك و زوريهم و بعد الزيارة رجعوا احكوا مع بعض لأن بعد ما تتجوزي و يصير عندك ولاد رح تنسي شكل رفيقتك و لما تفكري تحاكيها تلفون رح يكون نص الحديث معها والنص التاني ( فوت غسل ايديك .. شو وقعت عالأرض .. وطي صوت التلفزيون .. كمل دروسك .. ايه معك انا معك ) أو اذا كان أصغر ((خدي بده يحكي معك .. وهو عم يتنفس بأدن رفيقتك لا راضي يحكي ولا قبلان يعطيكي السماعة ))

٤-كلي كلشي بالبيت حتى اذا قدرتي كلي أبوكي و أمك لأن بكرة بس تتجوزي و تخلفي رح يبقى الأكل قدامك وانتي قاعدة عينك بتطلع عليه بس مستنية دورك ايه دورك لا تستغربي

٥-اشربي شاي كتير أد ما بتقدري قبل الأكل و بعد الأكل و بوسط الأكل لأنك بعد الجواز و الخلفة كباية الشاي بالنسبة الك يا مسأعة يا رح تندلئ عليكي سخنة يا حدا عم يبسلك فيها شي و فجأة رح تتعكر هي ومزاجك سوا

٦- قضي نص يومك بالحمام ماتستعجلي خدي كتبك و موبايلك وحطي أغاني وقضي الويك أند بالحمام
لأن بعدما تتجوزي و تخلفي رح تفوتي الحمام بأعجوبة و يا ريت لحالك رح يكون ولد معك جوا و تنين واقفينلك عالباب وكأنك آخدة تصريح دخول الحمام تحت المراقبة.

:crazy: