منتديات حبة البركة - قصة شفاء بالكي

السلام عليكم ورحمة الله و بركاته

أريد أن أنقل لكم هذه التجربة لعلاج التصلب العصبي بالكي

قد ترون الفكرة غريبة

تابعوا الموضوع

بنتي رهف عمرها 19 سنه مصابة بالتصلب العصبي من سنتين ونص

تقريبا كل 6 شهور كان يصير لها هجمة وكل مره اقوى من الثانيه مع العلم انها منتظمة على علاجها ابر افونيكس وفيتامينات وجربنا معها طرق علاجيه كثير ولما سمعت عن نظرية زامبوني برغم ان كل اطباء الاعصاب ضد هالنظريه ومعاهم حق وبامكانكم تتأكدون من هالمعلومة لان الاوعية الدموية لا اصابها خلل تتوسع عمرها ماتضيق مع كذا عملت لها دوبلر لكن طلعت نتيجة الاشعة سليمه" وكل هالشي مافادها

اعراضها تزيد يوم عن يوم كان بداية المرض باطرافها اليدين والرجلين وانتشر في باقي جسمها صار بالوجه والظهر والصدر مع الاطراف

جدي الله يطول بعمره كل مره كان يهاوشني يقول خذو بالاسباب ودو بنتكم تكتوي وانا مااسمع كلامه

لماصارت لها هجمه قويه مره بتاريخ 2/6/1431

ماصارت تتكلم ولا تحرك اطرافها وماعاد تقدر تتنفس الا ببطئ شديد كانت بنتي بتروح فيها لولا ستر الله ودكتورها خوفني كان يقول لازم تخضع لعلاج كيميائي رفضت انا وابوها هالعلاج

عرف جدي وحلف علينا انا نوديها تكتوي بعد ماتطلع من المستشفى على طول

وفعلا خلصت كورس الكورتيزون طلعناها من المستشفى و اليوم الثاني الصباح وديتها للشيخ الصمعاني اذا تعرفونه دلني عليه جدي

فحصها لمس يدينها ورجولها قال بارده مافيها دم ثم لمس راسها وضغط عليه باماكن متفرقه وسالها ان كان يوجعها المكان الي يضغط فيه لما علمته عن المحل الي يوجعها قعد يضغطه وقال هذا عرق محتبس فيه الدم " وياثر بحركة الدم لباقي الجسم

وقال بكويها فيه مسكها ابوها وجدها وكواها براسها

منعها من اللحوم الحمراء ومن النوم قبال التكييف ومن التفكير الزايد

ونصحها باكل التفاح وشرب زمزم وحبة البركه مع العسل وان ماقدرت تنام تحط على راسها ملفوف زي الطاقيه ثم تلبس عليه كبوس صوف واليوم الثاني تشيله

وكل هذا وربي ماطلب منا ولا ريال عطيناه الي كتب ربي

والحمد الله راح الشر الاعراض الي كانت تعانيها بنتي قبل اختفت تماما بفضل ربي والله ماعاد تشكي لامن تنميل ولا من وخز ولا شد

وتنوم زي الناس حتى الصداع خف عليها

ومن هذاك التاريخ لليوم بنتي عايشه حياتها طبيعي ماشاءالله تبارك الرحمن
فحوصاتها واشعتها سليمه الحمدالله
دكتورها اخر مره فحصها كان قبل شهرين قال احنا مسكنا طريق الشفاء ان شاءالله وكل ماكنت الفتره بين كل هجمه والثانيه طويله هذا شي يبشر بالخير ماشاءالله

تكفون اذكرو الله

يشهد ربي ماكتبت قصة بنتي وبالتفصيل الا لجل تستفيدون
ومو كل شخص يقول اكوي يكون عارف لازم تسالون وتتاكدون بعضهم غرضه مادي والعياذ بالله

والله يكتب الشفاء لبنتي ولكم ويكفيها واياكم شر هالعلاجات
ويلبسكم ثوب العافية .. امين