منتديات حبة البركة - الفكـر شـارد

الفكـر شـارد وأنا ودي ولا ودي
والعمر محدود والأنفاس محسوبه

وأنا من العقل متعشي ومتغـدي
والحمدلله أعـرف الدهـر ودروبـه

والله فلا أطمع بثوب مايجي قدي
يوم أكثر الناس دايم مسبلن ثوبـه

وشلي على اللقمة اللي في طرف يدي
ماأقدر عليها وهي ماهيب مكتوبه

كم واحد يحسب إن اللوم متعدي
واللوم غآشيه من رأسه لعرقوبـه

نتبع ظروف الزمن ونجيب ونـودي
ونقوم ونطيح كلن دون ماجوبـه

مابين موج البحر والجزر والمدي
تبقى الثقة حاجة في النفس مطلوبه

حتى لو إن الظروف تسير في ضدي
لابد ترجع ظروف الوقت مغلوبه

ورث ورثته ورثة أبوي عـن جدي
ماهين نفسي ورا اللي ينفخ اجنوبه

أعز نفسـي وأنـا مانيـب منحدي
الأمر لله وباب الرزق مـن صوبـه

إخوان يوسف من أصل الأب والجدي
خذوه مرة وراحوا بـه ولا جوبـه

يبقى الردي في عيون الناس متردي
متوقي في لحافن يستـر عيوبـه

هذا وأنا طول عمري ما انكشف سدي
عالي النظر والقلوب السود مقلوبه

أساير الوقت واثر الوقـت متحدي
يطرح ويجرح ونار الموت مشبوبـه

لا..واعساها سحابة صيـف وتعـدي
الهاجس اللي يلوف القلـب ويلوبـه

أموت وارحل ودمعي ماوطا خدي
حتى لو الروح مسلوبه ومنهوبـه

منقوله