اقول خلوكم مثلنا بس
والله ياالانسانيه ما قامت ولا قعدت عندنا
فالين أم الحياة.. إجازات ونوم وتسدح وتبطح ولله الحمد والمنـّه
شوفونا ايام السنه 365 واجازتنا 355 يوم
الموظفين..شهر أجازه نظاميه و10 ايام اضطراريه
و3 شهور تروح ما بين اجازاة وفاة والديه وعمانه وعماته وخواله وخالاته
وامهاته من الرضاع وابوانه من الرضاعه واصدقاه من الرضاع
الموظف السعودي هو الوحيد في العالم اللي تتوفى له 12 جده و12 جد في السنه..
ومنها شهرين استئذانات من المدير علشان يجدد الرخصة والاستمارة
ويضيف ولده في دفتر العائلة ويسجل ولده الثاني في المدرسه
ويطلع ولده الثالث من مرور الناصريه ..
و55 يوم يطلع من الدوام يبلغ الشرطه عن شغالته المنحاشته
و3 شهور اجازات مرضيه منها شهر ونص في السنه إجازات خلع أسنان .. تماسيح مهوب موظفين
وبعدين مدري وش ذا الأسنان اللي يخلعونها وتنبت ..
تصدقون يا جماعه إن بعضهم يكون باقي عليه ويتقاعد سنتين
ويجيب أجازه مرضيه بسبب خلع ضرس عقل
واللي موقع الاجازه طبيب نساء وولاده
والطلاب والطالبات إجازات الصيف 3 شهور
ومعها مكرمه من أهالي الطلاب نص شهر
وإجازة حج 20 يوم
معها مكرمه 10 أيام من أهالي الطلاب والطالبات
و10 أيام اجازات نص سنه
ومعها 15 يوم مكرمه من أهالي الطلاب والطالبات
وإجازة ربيع ومعها 15 يوم مكرمه من اهالي الطلاب والطالبات
وإجازات امطار وإجازات غبار
وغيابات بسبب الانفلونزات
وغيابات للطلاب بسبب هزايم فرقهم..
واللي مسكوه المرور وخلوه يفك انوار الزينون
وعلم أبوه ولعن جدفه ..وتعبت نفسيته
وغيابات للطالبات بسببنفسياتهم تعبانهم ..
وأسباب تعب نفسيات البنات متعدده
اللي قصت شعرها وطلع وع
واللي محد عطاها وجه على البي بي
واللي طلعت لها حبة شباب في خشمها
وقاعده طول الليل تراقب ذا الحبه لين تعبت نفسيتها ..
ميسي مهيب حبة شباب
الزبده أن الطلاب ما يصفى لهم من دراسة ال8 شهور إلا 18 يوم
أما المدرسات والموظفات فحدث يا اها بس ولا حرج
إجازات مثل الإجازات الرسميه للطلاب والطالبات
وأضيفوا لها إجازات مرضيه أثناء الحمل
واجازات نفاس ممكن توصل ل 3 شهور
عشان كذا ذا المدرسات هم اكثر من يحمل ويولد
بزعمها إنها بتكثر امة الإسلام وهي تبي تتبطح وتتسدّح
طبعا اضافه للإجازات المرضيه بأنواعها
المدرسة تراجع كل التخصصات الطبية علشان تجيب منهم أجازه
أسنان وانف واذن وباطنيه وبوليه وجلديه ونساء وولاده
وعظام واصابات ملاعب
وأجازه علشان فيها ضيقه وشاكه إن منظوله
على طاري الضيقه ..
قسم لو للرقاة الشررعيين صلاحيات منح اجازات مرضيه
إن ما تلقون مداوم في مدارس البنات إلا البواب والفرّاشه و5 طالبات دافورات
نرجع لمحور حديثنا ..
وغياب بعض أيام الأربعاء لأنها بتروح لزواج
ولازم تمسك سرا عند الكوافيره من الضحى
وأجازه مرضيه بعض أيام السبت لأنها كانت عازمتن حمولتها وتعبت
مع ان حمولتها كانوا عندها يوم الأربعاء ..
الحين الشغاله هي اللي تتعب والمدرسة هي اللي تاخذ أجازه!!!