الجزء الرابع من رحلتي مع التصلب...
بعد أن تفاجئت باعراض المرض قررت ان انتظر قد يكون شيء عارض و يزول و قررت ان لا اخبر اهلي وافزعهم وكانو يلاحظون الثقل بمشيتي واني اجلس قريبه من التلفزيون اذكر واحد من اخواني قعد يوريني كاريكاتير بالجريده ويقول شوفي وش راسمين ويضحك ورفع الجريده من بعيد الانسان الطبيعي بيشوفها ولكن الحمد لله على كل حال كنت اشاركه الضحك و اضحك و انا مني شايفه شي قالي فهمتيها ضحكت قلت اكيد وصار يشرح وانا اضحك و اقول ايه صح فصرت اضيع الموضوع و اقول وين امي خفت يوريني شي ثاني فقمت من مكاني ولا خلصت قلي وشفيها رجلك قلت تاعبتني شوي فصار يخمن تزحلقتي وانا اقول لا طحتي وانا اقول لا قال يمكن شد عضلي قلتله يمكن بروح عند امي فوقتها قررت اتوجه للكمبيوتر واكتب اعراضي لاني احترت اروح طبيب عيون ولا عظام و راح عن بالي الاعصاب فسبحان الله بس كتبت اعراضي على طول طلع موضوع التصلب اللويحي و كان اول مره بحياتي اسمع عن هذا المرض فقرأت عنه بشكل مبسط فقعدت اتذكر يوم كان عمري 16 و اطباء الاعصاب فقلت معقول كان عندي المرض و راح ورجع فقررت اقول لامي اني بروح لدكتور الاعصاب امي استغربت قالت ليه في شي قلت رجلي تاعبتني وفي الكمبيوتر ينصحون باطباء الاعصاب فرحت لدكتور اععصاب فطلب اشعة رنين سبحان الله سويت الاشعه طلعت النتيجه مافي شي قال مافي شي بنعطيكي مضاد اكتئاب قلتله الحمد لله من قال عندي اكتئاب قال اتوقع هذا اللي عندك قلتله اكتئاب يسبب فقدان رؤيه جزئي قال يمكن وهم قلت رجولي ثقيله اسحبها بقوه قال لانك رافضه الحياه؟؟!! قلت يا ساتر قلت يالله خلني اجرب كلامه و خذيت العلاج و صرت انام 16 ساعه باليوم و الحاله تشتد ومن طبيب لطبيب الين وصلت لدكتور هندي قال لازم اشعه صبغيه لانه الي عندي اعراض تصلب قلت تصلب تصلب بس المهم اعرف وشفيني وفعلا سويت الاشعه و لا لقيت الدكتور الهندي فرحت لدكتور ثاني قال فعلا عندك تصلب وانا على نياتي قلت الحمدلله انكم عرفتو قالي فرحانه قلت اكيد على الاقل اخذ العلاج المناسب قالي ومن قال انه للتصلب علاج طبعا انصدمت قلت انا قريت علاجه بالانترفيرون قال هذا مو علاج هذا يمنع هجمات المرض و تفاقمه جلست مصدومه وساكته قال انتي معي قلتله طيب موب مشكله العكاز اللي بيدي اشلون اتركه قال خلاص استحاله تتركيه قلت ولا بالعلاج الطبيعي قال و لا يفيد معك و يا خوفي مع الايام تضطرين تستخدمي كرسي متحرك يوم قال ذا الخبر كانه صب علي مويه باارده في عز الشتاء تجمدت مكاني و هو يسألني وشفيكي انصدمتي صح و يضحك تفرجت عليه وش ذاا الدكتور العبيط يعطيني خبر مفجع و يضحك قال وش رايك نبدء بالانترفيرون قلت ما ابي شي بروح ماقدرت اقوم من مكاني و كان معي عاملةالمنزل احمد الله انه امي ما جت معي و ربي ما قدرت اوقف من الصدمه قال جيبولها كرسي متحرك قلتله ما ابي اشوف ذاا الكرسي بحياتي و بأذن الله ما راح يدخل حياتي ضحك باستخفاف وقال نتمنى ذلك اقسم بالله هذا الدكتور على قد ما كان اسلوبه مستفز اعطاني دفعه اني ابحث عن هذا المرض رجعت البيت وحالتي ما يعلمها الا الله سألتني امي هاا وش قالولك قلت كلام كثير بس ان شاء الله الله بيكتب الخير ما عجبها كلامي قلت بروح انام ما نمت زين امس دخلت غرفتي و صرت ابكي ابكي معقول سأعيش معاقه حياتي بتكون ورا كرسي متحرك فرحت اتصفح النت وعيوني مليانه بالدموع وبحثت عن المرض وانا ابحث لفت نظري الخلايا الجذعيه وعن بروفسور يدعى الدكتور عادل تعلم هذه العمليه قررت اروحله..
يتبع
|