لكل مغنى مقام.. قصيدة محمد أبو عمرة فى ملتقى بيت الشعر العربى

لكل مغنى مقام.. قصيدة محمد أبو عمرة فى ملتقى بيت الشعر العربى

يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.




لكل مغنى مقام .. لـ محمد أبو عمرة



لكل مغنى مقام
غنيت..
لُقاء الأحباب في محطة المترو
أخرس وبيكلم حبيبته
الولد
حوِّل صوابعه لفُرشة زيت
البنت
الحب حوِّلها لبلاتة الألوان
رسموا المشاعر في الهواء أنغام
عزفوا المشاعر جَوِّا قلبي بكيت
والحب بينهم.. كان فن سريالي
وكإنهم بطلين في لوحة ل "سلفادور دالي"

غنيت
شتا بيعزم الأسفلت ع المطرة
خيالين يسبيبوا صحابهم الخايفين
ويجروا في الشارع
خيالين
معرفوش طعم البرد من فترة
مشهد رومانسي بالفعل كان بارع
لخيال بيقطف م المطر اللي نازل ورد
يهدي لحبيبته الشتا في بوكيه
غنيت.. كافيه
وكراسي سقعانة
بتستنى لُقا العاشقين
يدفيها بحضن إيدين
كلام في العين يغنيها
كراسي.. ملت الإتيكيت
لكن قدرت تصون السر بين اتنين

جرسون عجوز
حافظ أماكن كل اللي بيزوره يوماتي
حتى لو عدت سنين
بيحرك الذكرى ما بينهم
بكلمة كتبوها على جلدة ال "منيو"

جرسون
معرفش يبقى البطل ولا مرة في المشهد
ساعة اللُقا
لكن قدر ساعة الفراق يتجسد ال "سنيو"
يبكي .. وهو بيردد الجُملة معاهم
- جايز هنتفارق
*جايز هتتفارقوا
-لكن هنتقابل
*أكيد هتتقابلوا
-ما تقولي إمتى وفين؟
*بأوانه وبوقته.

يتفارقوا في الطريقين
بعيون بتشتي دموع
والكل كان موجوع
وهو بيلبس الدبلة اللي خبَّاها ساعة الُلقا

غنيت بقى
ولكل مغنى مقام
غنيت سنة لقدَّام وفضلت مستني
حتى الغُنا خانّي
وأنا حلمي كان للبيع
مين يشتري مني؟

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر