مسلسل يوميات مشرف

الحلقة الثالثة




مدير عام المنتدى :
يا جماعة أنا عايزكم تفتحوا عينيكم وتراقبوا الناس كويس ..
الفترة دى حرجة وحساسة فى تاريخ المنتدى ..
ودلوقتى تقدروا تتفضلوا على مكاتبكم جتكوا البلاوى


المشرف هامسا فى أذن المراقب :
إيه العبارة .. مال البيج بوس بيشخط فينا كده ليه ..
اللى يسمعه كده يفتكر إن احنا بنعبى فى فلوس
من ورا الشغلانة دى ..
ده أنا الشغلانة دى لولا إنها عاملالى بريستيج ..
ولا كنت قبلتها .. إنت عارف إنى كان نفسى من زمان أبقى مشرف .. حتى لو على فرقة ..

( الم النقطة يعنى والهدايا..)


المراقب :
عارف يا محمود أنا زيك بالظبط ..
إنت عارف إنى كان نفسى أدخل كلية الشرطة ..
عشان تبقى فى إيدى سلطة بس مجموعى فى الثانوية العامة
ماجابنيش ولا ودانى ..
وبعدين كمان مكنتش حقبل فى الشرطة عشان مكلبظ ..



حلموس :
ممكن نبطل رغى شوية ونشتغل شويتين..
الجدع اللى كاتب موضوع
(إيه الفايدة من ورا المنتدى ده )
عايزين نحول أوراقه لفضيلة المفتى


المشرف :
هوه المفتى فاضى لنا يا حلموسى
المفتى بيحضر من دلوقتى علشان الحج ..
إحنا نصفى الجدع ده من سكات..ولا من شاف ولا من درى
فى العزومة الجاية فى المول يكون اسلام ومحمود راكبين موتوسيكل ومعاهم حزلقون..
وأول ما يشوفوه داخل المول يصفوه ويهربوا


احمد نينجا :
وأنا عليا هجيب لكم صورته..
هخترق جهاز الكمبيوتر بتاعه وأدعبس فيه على صورة له
يكون مخزنها على الجهاز..


حزلقون:
أنا ضد التصفية الجسدية..
.. يعنى اللى زى ده لازم يكون على راسه بطحة ..
واللى بيته من قزاز ما يحدفناش بالطوب ..
فاحنا نعرفها ونبتزه .. وناخد منه اللى فيه النصيب ..
ولا من شاف ولا من درى ..



فتكات :
تعالوا بسرعة.. الحقونى .. شوفتوا الموضوع دة ..

يجتمع المشرفون حول فتكات
فى فزع متسائلين (موضوع إيه ؟؟)

فتكات :
ده موضوع مكتوب فى صفحة الحوادث
فى ( الجريدة ) مش هنا فى المنتدى ..

المدير العام :
ممكن تتكلمى علطول ..
أقصر الطرق إلى الحقيقة هى الخط المستقيم


فتكات :
قصدك أقصر الطرق إلى السجن


ينتزع المدير العام الجريدة بقرف
من يد فتكات قائلا :
يختى إنطقى إحنا ناقصينك

يقرأ المدير العام المكتوب فى الجريدة بصوت مرتفع :
مقتل عامل نظافه بالمول ..
واحنا مالنا يا جماعه
شوفوا اقسامكم مالها مليانه اعلانات





المشرف :
: إنت يا عم الغبى.. هو احنا لحقنا نعمل حاجة ..معظمنا بقى مشرفين ومراقين اسماء على ورق وبس



حزلقون:
شئ غريب فعلا .. لازم ألاقى حل للغز ده ..



المدير العام
لغز إيه وهباب إيه .. الله يخيبكم ..
كنتوا هتودونا ف داهية ..

انا كان عندى استعداد انى احرم نفسى من العشا ..
علشان تستعشوا
احرم نفسى من الغطا .. علشان تستغطوا

انتوا اللى زيكوا مش لازم يعيش ليوم الثلاثاء
ولا الاربعاء ولا الخميس ..!!
ده أنا لو معين أرنوب بدالكم كان عمل شغل أنضف من كده ..

إنتم إيه مشرفين ولا اكياس جوافه ..
ايه يا مديرنا العام فين صاحب المنتدى
علشان اشكيلوا منكم
انتم عاملين الف مراقب وماهمش موجودين اصلا


والله مانا فاتح المنتدى النهاردة ..!!والمفتاح معايا






وحلقة اخرى ..

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: موضوعات عامة

الحلقه الرابعه
............

بسم الله توكلنا على الله
اما اروح كدا المنتدى وافتحه واشوف الخلق صحوا ولا فى سابع نومه
يا فتاح يا عليم صبحنا وصبح الملك لله رب العالمين
............
5 تنبيهات لقيتهم
4 اعجاب
1 رساله خاصه
اما اشوف الرساله الاول من عضوه جديده اسمها انا كدا
الرساله( صباح الخير..انا عضوه جديده ومش عارفه انزل موضوعات ممكن مساعده)
الرد(طبعا ممكن )
وبدأت اعاونها واساعدها
والحمد لله اشتغلت بعد ما تعبتنى

العضوه انا كدا

انا-يااااااااه انتى مهببه ايه انتى منزله اللحمه على الموز على الفراخ

هى- ليه يا اخى ما لكش دعوه بيا اصلا
انا- تعرفى لو الموضوعات دى فى قسمى كنت حذفتها
هى- ما تقدرش ممكن اشتكيك للاداره
انا-يا ( انا كدا) التزمى بقوانين القسم لو سمحتى
هى - مش حارد عليك
انا- متشكر
طيب اعمل فيها ايه
............
الحمد لله
افتكرت
ارسل رساله للمدير العام ولا اسامحها
لالالا المسامح كريم

السلام عليكم يا احمد
الاعضاء بيشتكوا منك ليه حاول تكون غير كدا
لو انت مش مشرف نشيط كنت طردتك من المنتدى
انت زعلت العضوه (انا كدا) وتستحق انذار
طبعا دى رساله وصلتنى
انذار انذار
حاولت اوضح الامور لاقيتها معكوسه يا بوى
اللى يشتغل هنا ياخد انذار
واللى ينام يكون احسن
............
يا خبر اسود
مش مصدق عيونى
انا كدا اسمها بقى احمر
بقت مميزه
....
مع الوقت

دا بقى بنى بقت مشرفه

مع الوقت

ياااااااه

اللون بقى اخضر

رقوها الى مراقب عام
يا خبر
دا هى عملت يا دوب 555 موضوع اغلبهم ردود
وابو حميد اللى هو انا عامل 5555 موضوع

يا خلق هوه فيه ايه انا مالى
بس فيه حاجه
دا من شهرين ما كانتش بتعرف تنزل موضوع
يا خيبتنا الكبيره
ناس لها بخت

والاغرب انها قطعت من المنتدى ولسه مراقب عام
والله لقايم نايم والنوم عبادة

الحلقة الخامسة



المدير العام بيقول للمراقب :
متنساش تجيب الديجيتال كاميرا العهدة بتاعة المنتدى
اللى بنصور بيها الأعضاء الجداد وش وقفا وهما بيسجلوا
عندنا هنا أول مرة يوم الزيارة علشان تاخدولى كام صورة
مع لجنة حموم الانسان دى ..


المراقب :
أمرك يا بوس .. ونتكلم دلوقتى عن التنظيم ..
انا بقترح إننا كلنا نلبس بدل اسموكن سودا وبابيون أحمر ..



المشرف :
بس شكلنا كده حنبقى زى السفرجية يا كنج ..
أنا بقول يعنى بلاش نلتزم كلنا بنفس اللبس ..
يعنى اللى عايز ييجى ببدلة ييجى .. اللى عايز ييجى بجينز
وتى شيرت ييجى .. وكده يعنى !!


حلموس :
فكرة حلوة يا موشى التى شيرت دى .. إحنا نلبس كلنا
تى شيرت واحد عليه صورة المدير العام كرمز للمنتدى
وبنطلونات شورت زى بتاعة الكشافة وجزم اديدز..
وشرابات طويلة لغاية الركبة ..


احمد نينجا :
ياعم شورتات إيه بس وشرابات طويلة ..
أهم حاجة نلبس كلنا نضارات سودا ونحط سماعات فى ودانا ونقعد نتلفت حوالينا وورانا ونبص لبعض كل شوية
نظرات قبيحة ومريبة فى نفس الوقت..
ولازم نبقى على إتصال مع بعض باللاسلكى أثناء الزيارة ..
مهم جدا اللاسلكى ده علشان ننبه بعض لو عضو من إياهم
حاول التسلل أثناء الزيارة .


حزلقون :
لازم نحبس الأعضاء أثناء الزيارة اللى إحنا متأكدين
من عدم ولائهم لينا... بس المشكلة إننا لو عملنا كده
مش حيتبقى غير تلاته أربعة ومش حنعرف نجيب أعضاء
نوقفهم قدام أبواب المنتدى علشان يهتفوا ويرحبوا باللجنة ..

احمد نينجا :
مش مشكلة .. نجيب كومبرس على إنهم الأعضاء..
كمان هيلزمنا حتتين سلاح.. لازم أوصل البلد عندنا أشترى
كام فردة واجيب أنفار ..



فتكات :
واجب برضه نشترى شوية بالونات وبمب والعاب هوا ..
نسينا كمان نعمل قسم جديد فى المنتدى نسميه ( الاستحماية ) علشان اللجنة تفتتحه .. ولازم كمان نحط شريط سوليفان
على كل باب من أبواب المنتدى علشان اعضاء اللجنة
يقصوهم .. لازم ياجماعة كل واحد يقص له شريط على الأقل.. ولوإتبقت شرايط بعد كده أقصهم أنا ..


تعالت أصوات المشرفين إحتجاجا على رغبة فتكات
بأن تقص ما تبقى من شرائط ..


حلموس :
وليه مقصهمش أنا


المشرف :
محدش حيقص غيرى ..


حلموس :
طب يمين على يمينك محد هيقص إلا أنا ..
ثم تنتابه نوبة من البكاء الشديد ..
وتدور الدنيا به وتظهر أمام عينيه دوامات كأنه يتذكر
أيام الطفولة والماضى المنيل بنيله ..
ويتمدد حلموس على الأرض ويتجمع المشرفين من حوله..


يقوم المراقب بعمل تدليك سريع للقلب لحد مافاق
وبدأ يروى لهم قصته مع الإشراف



حلموس :
زمان وانا عمرى 7 سنين كنت بروح مع أبويا الدكان
كل يوم جمعة بعد الصلاة .. كان عندنا محل أقمشة فى الدرب
الأحمر .. كانت متعتى إنى أشوف العامل اللى فى المحل وهوه
بيقص القماش للزباين.. كان عنده مقص كبير قوى طوله يجى
نص متر .. مره سهيته وخدت المقص وخبيته فى جيب القميص
بتاعى لكن أبويا شافه ونزل فيا ضرب بالإقلام والشلاليت وإنضم
له كل العمال فى الدكان.. لحد ما سخسخت..
ومن ساعتها وأنا أى حاجة بشوفها ببقى عايز أقص منها.!!


حزلقون :
أمال لو حكيتلكم حكايتى حتقول إيه



المدير العام طيب ..
ندخل فى البند اللى بعده والخاص بالمأكولات
التي ينبغي ان نوفرها لاعضاء اللجنة
ممكن أسمع أرائكم؟


احمد نينجا :
بـــس أنا جتلي فكرة جهنمية ، منها نعمل حاجة تشرفنا قدام الناس دي ومنها نوفر


المدير العام :
قول يا ابو النصاحة إحنا سامعين


احمد نينجا :
أنا انزل السوق أشترى كرومباية على 2 ك بتنجان أبيض
وحزمة ملوخية خضرا و 4 ك لحمة ضاني ونخلى المشرفات
يعملوا حلتين محشي و ملوخية وناكل كلنا ونهيص ..


المراقب:
ممكن يا اخ نينجاوى تطلع بره شويه وهانندهلك لما نخلص


احمد نينجا :
حاضر .. بس ليه يا كنج ؟




المدير العام :
يا اخ نينجا بنقولك حاجة تشرفنا .. تقولنا محشي ،
يا اخي عيب كده .. ده كان إستهلال لابد منه ..
هـــــا يا سادة انا عايز مشاركين لا متفرجين


حزلقون :
بس وجدتها .. إحنا نعمل علب وجبات وكل وجبة فيها
سندوتش جبنة رومي وحتت جاتوة ..


فتكات :
إيه نظام الأفراح البلدي ده ؟ عايزين أفكار محترمة يا أخوانا


حلموس :
ممكن أقول رأيي ؟


المدير العام :
أيوه وماله من حقك


حلموس :
زي مانتوا عارفين أنا عندي مزرعة في الكيلو 923
وانا مربي هناك كام دكر بط على فرختين عتاقي ،
فأنا بأقترح إننا ندبح البط ده جنب الفراخ
مع شوية برتقان بصرة من بتوع المزرعة ونمشي الليلة


حزلقون :
والله شكلكوا هاتكسفونا مع المحشي والبط والكلام ده
واللجنة هاتيجي تغلق المنتدى بسببكم ،
يا جماعة الناس اللي جايه فيهم ناس كبيرة في السن يعني
بالتأكيد عندهم السكر والضغط والكوليسترول والكلام ده .. عايزين حاجات خفيفة وصحية وعلى رأي المثل
" صحي ومفيد "
( قال يعنى ده مثل )


المراقب :
شكرا يا سادة .. بعد ما أستمعنا إلى جميع الآراء
بشكل ديمقراطي ديماجوجي ..
احب أقوللكم إن انا والمدير .. إتفقنا من الاول إننا نتصل
بمطعم مكسيم عشان يبعت لنا وجبات جاهزة
وتبقى حاجة محترمة قدام اللجنة ..


فتكات:
يحيا العدل هي دي الديمقراطية .. الله ينور عليك بس
عدم اللامؤخذه إنتوا كنتوا جايبنا ليه وسمعتوا أرائنا ليه ؟


المراقب :
ممكن تسكتى؟


المدير العام :
ننتقل للبند اللي بعده ... المشروبات ...
ولو سمحتوا اللي هاشاور عليه هو بس اللي يتكلم
مش عايزين فضايح ..
أيوه أتفضل يا اخ حلموس


حلموس :
ربنا يخليك لنا يا بوص ده أحنا من غيرك ولا حاجة
وناقصنا كام مليون حاجة


المشرف :
هايشتغل بقى في الاغاني الحمضانة بتاعت شادية
ومصر اليوم في عيد وهاينكش لنا القصة بتاعته ..
الشغل ده أنا عارفه


المدير العام :
مش اناقولت ماحدش يتكلم إلا اللي أشاور عليه ..
عمومآ خلاص خلاص..
انا قررت انا و المراقب أساسا إننا نقدملهم يانسون




فتكات :
برافو عليك .. أنا بحب جدا الحاجات النيتشورال اللي زي دي

واهى منها مهدئات .. ربنا يهدهم يارب




المدير العام بيقول للمراقب :
مهدئات !! هى البت دى بتشتغل فى صيدلية
بعد المنتدى واحنا ما نعرفش !!
عمومآ .. اقفل عليهم المنتدى لما الليلة دى تعدى على خير ..




واتقفل الاجتماع على خير..





وحلقة اخرى ..