قصص تكة مفتاح الباب

قصص تكة مفتاح الباب

واحده من حالات الطلاق اللى حضرتها كان سبب موافقتي على الطلاق جملة قالتها الزوجة : "بطني بتوجعني في معاد رجوعه "

واحدة تانية قالت لى من سنين " كنت أتمنى ولادى يعرفوا التمن اللى بدفعه كل يوم علشان يسمعوا صوت تكة مفتاح أبوهم فى الباب واحساسهم بالأمان إنه وصل"..
توقفت أمام المعنى كثيرًا !

غريب الإحساس اللى بيوصل كل ست مع تكة مفتاح جوزها فى الباب .

فى ست قالتلى : أول ما كنت بسمع مفتاحه كنت بحس إني مخنوقة، وصل الشخص اللى بيسحب مساحة حريتى واحترامى الآدمى، كنت بحس إنى من غيره إنسانة ولما الباب بيتفتح بتمنى الموت ولا إنى أعيش معاه، خطواته كانت بتفكرنى بعشماوى!!
فى راجل وجوده فى البيت نكد وهم ، مخبر عايش معاهم بيراقب كل حاجة وبيتخانق على أتفه حاجة وحتى لو العيال بتحبه فالأم بتدفع تمن الحب ده من نفسيتها كتير.

في واحدة قالتلى الأمان فى حياتى وقف عند تكة مفتاح أبويا الله يرحمه ودخلته علينا بالحضن....

فى ست قالتلى ولا بيفرق معايا وجوده من عدمه، هو بيتعامل مع البيت على إنه أوتيل بيجى ياكل وينام ويغسل هدومه ويسلم على العيال ويجرى يخرج مع أصحابه ولا عارف كان يومنا إزاى ولا مين عيان ولا مين عنده تمرين، أعظم مشاركة ليه إنه يسمعنا على العشاء واحنا بنتكلم مع بعض.

ورغم كل معاناة الستات اللى فاتت إلا إن فى ست بتستنى على نار تكة المفتاح..

فى ست بتحس بأمان غريب مع صوت المفتاح، بتحس إن البيت كان من غير سقف، من غير حماية، بتحس إنها كانت وحيدة وبتستنى بفارغ الصبر اللحظة اللى بيوصل فيها الشخص اللى بيرسم ابتسامة على وشها،
بتفرح بتكة المفتاح وبتستقبله بحضن والعيال فرحانة إن أبوهم وصل ويمكن فى إيده كيس فيه حلويات أوهدية أوحاجة طلبوها منه، بتحس إن البيت ليه سقف أخيرا.

رجالة كتير بتدفعهم طبيعة شغلهم للسفر بالأيام والأسابيع والشهورأحيانا،

الست اللى بتحب راجل بتفتقد أكتر حاجة صوت تكة مفتاحه فى الباب بتنام وهى أحيانا خايفة إن البيت مفيهوش راجل أو حتى لو مش خايفة لكن حاسة بوحدة وشايلة المسؤولية لوحدها ومش محتاجة غير جوزها تحكيله وترغى معاه...
ويسمعها ويرد عليها...

الراجل اللى بيزرع فى قلب مراته حنية بترجعله أضعاف من الحب والحنان والاشتياق لصوته وريحته ودخلته عليها هى وعيالها.

والراجل اللى بيرازى فى مراته وبيزرع فى قلبها قسوة بيتكسر وراه قلة وبيعيش وحيد حتى وهو فى وسط البيت والعيال والست،

بحس دايمًا إن الحياة عادلة جدًا فى إنها ترجعلنا كل اللى زرعناه بالضبط.

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: موضوعات عامة